403 | VIRAL FEVER | വൈറല്‍ പനികള്‍

403 | VIRAL FEVER | വൈറല്‍ പനികള്‍
403 | VIRAL FEVER | വൈറല്‍ പനികള്‍
കിരിയാത്ത്, കൊത്തമല്ലി, ചുക്ക്, ദേവതാരം, മുത്തങ്ങ, പാർപ്പടകപ്പുല്ല് – ഓരോന്നും പത്തു ഗ്രാം വീതം എടുത്ത്, ചതച്ച്, പന്ത്രണ്ടു ഗ്ലാസ് വെള്ളത്തിൽ കലക്കി വേവിച്ച്, ഒന്നര ഗ്ളാസ്സ് ആകും വരെ വറ്റിച്ച്, തണുത്ത്, അരിച്ചു വെച്ച്, ആ കഷായം അര ഗ്ളാസ് വീതം മൂന്നു നേരം കഴിക്കുക.
 
കൃമിഘ്നവും ജ്വരഘ്‌നവുമായ ഒട്ടനവധി ഔഷധങ്ങൾ ഈ പ്രകൃതിയിൽ ഉണ്ട്. അവയെക്കുറിച്ച് അറിവുള്ള വൈദ്യൻമാരുടെ പക്കൽ വൈറസ് പോലെയുള്ള അദൃശ്യകൃമികളാൽ ഉണ്ടാകുന്ന ജ്വരം അകറ്റാൻ അനവധി മാർഗ്ഗങ്ങൾ ഉണ്ട്.
 
കിരാതതിക്തകാദികഷായം സഹസ്രയോഗത്തിൽ അതിസാരം ചികിത്സിക്കാൻ ഉപദേശിക്കപ്പെട്ട ഔഷധമാണ്.
 
“കിരാതതിക്തകം മുസ്തം വത്സകം സരസാഞ്ജനം
പിബേല് പിത്താതിസാരഘ്നം സക്ഷൌദ്രം വേദനാപഹം”
 
പുത്തരിച്ചുണ്ടവേര്, മുത്തങ്ങാക്കിഴങ്ങ്, കുടകപ്പാലയരി, അഞ്ജനക്കല്ല് ഇവ കഷായം വച്ചു തണുത്തതിനു ശേഷം തേൻ മേമ്പൊടി ചേര്ത്ത് സേവിക്കുക. പിത്താതിസാരവും വേദനയും ശമിക്കും എന്ന് സഹസ്രയോഗം.
 
പക്ഷെ ഇതിലെ ചേരുവകളിൽ കൃമിഘ്‌നങ്ങളും ജ്വരഘ്‌നങ്ങളുമായവ ഉണ്ടെന്നുള്ള അറിവിൽ ആണ് വിവരമുള്ള വൈദ്യൻ ഈ ഔഷധം വൈറൽ പനികളിൽ ഉപയോഗപ്പെടും എന്ന് പറയുന്നത്.

ഔഷധസസ്യങ്ങള്‍ ¦ 37 ¦ പനിക്കൂര്‍ക്ക ¦ coleus aromaticus benth.

ഔഷധസസ്യങ്ങള്‍  ¦ 37 ¦ പനിക്കൂര്‍ക്ക ¦ coleus aromaticus benth.
ഔഷധസസ്യങ്ങള്‍ ¦ 37 ¦ പനിക്കൂര്‍ക്ക ¦ coleus aromaticus benth.

പനിക്കൂര്‍ക്ക – അമ്മമാരുടെ വൈദ്യവിജ്ഞാനത്തിലെ ഒരു പ്രധാന ഔഷധി .

കുറച്ചു കാലം മുമ്പുവരെ നാട്ടുമ്പുറങ്ങളിലെ പറമ്പുകളിൽ പ്രായേണ സുലഭമായി കാണപ്പെട്ടിരുന്ന പനിക്കൂർക്ക ഇന്ന് ചെടിച്ചട്ടികളിലെ കാഴ്ചവസ്തുവായി ഒതുങ്ങിപ്പോയ അവസ്ഥയിലാണ്. ഒട്ടുവളരെ ആമയങ്ങൾക്ക് പനിക്കൂർക്ക കൊണ്ടുള്ള അമ്മമാരുടെ കൈകണ്ട പ്രയോഗങ്ങൾ അനവധിയാണ്.

പനിക്കൂർക്കയില, തുളസിയില, കുരുമുളക്, ചുക്ക് – ഇവയുടെ പനിക്കഷായം പ്രസിദ്ധമാണ്. ഇവകൾ ഇട്ടു വെള്ളം തിളപ്പിച്ച് അവി പിടിക്കുകയും അതേ കഷായം ചക്കര ചേർത്ത് സേവിക്കുകയും ചെയ്താൽ പനി ശീഘ്രം ശമിക്കും.

 
കുഞ്ഞുങ്ങൾക്ക് വയറ്റിൽ അസുഖങ്ങൾ ഉണ്ടാകുമ്പോൾ പനിക്കൂർക്കയില നീര് പഞ്ചസാരയും ചേർത്ത് ദിവസം മൂന്നു നാലു തവണ കൊടുത്താൽ മതി. വയറ്റിലെ അസുഖങ്ങൾ പൊതുവേ ശമിക്കും.
 
പനിക്കൂർക്കയില വാട്ടിപ്പിഴിഞ്ഞ നീര് നെറുകയിൽ വെയ്ക്കുന്നത് കുഞ്ഞുങ്ങളിലെ മൂക്കടപ്പും ജലദോഷവും മാറാൻ സഹായകമാണ്.
 
പനിക്കൂർക്കയില വാട്ടിപ്പിഴിഞ്ഞ നീര് ചെറുചൂടോടെ പത്തു തുള്ളി വീതം മൂന്നു നേരം കൊടുക്കുകയും നീരിൽ തുണി നനച്ച്നെറ്റിയിൽ ഇടുകയും ചെയ്താൽ കുഞ്ഞുങ്ങളിലെ ജലദോഷവും മൂക്കടപ്പും ശമിക്കും.
 
മുലകുടിക്കുന്ന ശിശുക്കൾക്ക് ജലദോഷം ഉണ്ടാവാതെ സൂക്ഷിക്കാം. പനിക്കൂർക്കയില അരച്ച് പാൽക്കഞ്ഞിയിൽ ചേർത്ത് മാതാവ് കഴിച്ചാൽ മതി.
 
കുഞ്ഞുങ്ങൾക്ക് നീർവീഴ്ച ഉണ്ടായാൽ പനിക്കൂർക്കയില ചുട്ട് ചാമ്പലാക്കി ആ ചാമ്പൽ കുഞ്ഞിന്റെ ഉച്ചിയിൽ തിരുമ്മുന്ന ഒരു പ്രയോഗമുണ്ട്.
 
വായ്പ്പുണ്ണിൽ പനിക്കൂർക്കയില ചതച്ചു പിഴിഞ്ഞെടുത്ത നീര് അത്യന്തം ഫലപ്രദമാണ്. പനിക്കൂർക്കയില നീരിൽ തേൻ ചേർത്ത് പല തവണ കവിൾക്കൊണ്ടാൽ മതി.
ഉദരകൃമികള്‍ ശമിക്കാന്‍ : പനിക്കൂര്‍ക്കയില അരച്ചത്‌ 10 ഗ്രാം, രാത്രി ചൂടുവെള്ളത്തില്‍ കലക്കി കുടിച്ച ശേഷം, ചൂടുവെള്ളത്തില്‍ ത്രിഫല കലക്കി കുടിച്ചാല്‍ പിറ്റേന്ന് വയറിളകും, ഉദരകൃമികള്‍ പുറത്തു പോകും.

366 ¦ പനി മാറാന്‍ തുളസി ¦HOLY BASIL FOR FEVER

366 ¦ പനി മാറാന്‍ തുളസി
366 ¦ പനി മാറാന്‍ തുളസി

പനി മാറാന്‍ തുളസി

ഒരു പനി വന്നാല്‍ ഉടനെ പാരസെറ്റാമോൾ വാങ്ങാന്‍ മെഡിക്കല്‍ സ്റ്റോര്‍ തേടി ഓടുന്നതിന് മുമ്പ് സ്വന്തം വീട്ടില്‍ ശ്രമിച്ചു നോക്കാവുന്ന ഒരു ലളിതമായ പ്രയോഗം.

60 ഗ്രാം തുളസിയില രണ്ടുനാഴിവെള്ളത്തിൽ വെന്ത് ഒരു നാഴിയാക്കി, പാലും പഞ്ചസാരയും ചേർത്ത് ഒരു ചായകൊടുക്കുക. പനി ശമിക്കും. ഈ ചായ നിത്യവും കഴിക്കാം, പനിയില്ലെങ്കിലും ഒരു പാനീയമായി. കുറച്ച് ഏലത്തരികള്‍ കൂടി ചേര്‍ത്താല്‍ പനി പെട്ടന്നു ശമിക്കും.

ജലദോഷവും ചുമയും ചേര്‍ന്നു വരുന്ന പനികളില്‍ തുളസിയിലയും ഏലത്തരികളും ഒപ്പം കുറച്ചു ഗ്രാമ്പൂവും ചേര്‍ത്തു കഷായം വെച്ചാല്‍ പെട്ടന്നു ഫലം കിട്ടും.

മര്യാദാമസൃണമായി പറിച്ചെടുത്ത ഒരു പിടി തുളസിയിലയോടൊപ്പം, നാലോ അഞ്ചോ കുരുമുളക്‌ ചേര്‍ത്ത് നന്നായി അരച്ച് ഒരു നെല്ലിക്കാവലുപ്പം കഴിച്ചു നോക്കാം. പനി പെട്ടന്നു ശമിക്കും.

ഇതൊന്നും ഫലിച്ചില്ലെങ്കില്‍ പോരെ ഫാക്ടറികളില്‍ പടച്ച രാസവസ്തുക്കള്‍?

354 ¦ഉദരരോഗങ്ങള്‍ ¦പനി

354 ¦ FEVER ¦ GASTRO-DISEASES ¦ ഉദരരോഗങ്ങള്‍ക്കൊപ്പം വരുന്ന പനിക്ക് കൂവളം
354 ¦ FEVER ¦ GASTRO-DISEASES ¦ ഉദരരോഗങ്ങള്‍ക്കൊപ്പം വരുന്ന പനിക്ക് കൂവളം

 സാധാരണയായി നമ്മൾ യാതൊരു വിലയും കൽപ്പിക്കാതെ കളയുന്ന ഒന്നാണ് കൂവളത്തിന്‍റെ കായ. കൂവളത്തിന്‍റെ കായയുടെ കാമ്പ് (ഉള്ളിലുള്ള മാംസളഭാഗം, മധുരമായ അംശം) ഔഷധമാണ് എന്ന് അധികമാര്‍ക്കും അറിയില്ല.

 കായ പൊട്ടിച്ച് കാമ്പ് എടുക്കുമ്പോള്‍ അതിൽ കാറ്റ് കൊള്ളരുത്. ഫലം കുറയുമായിട്ടല്ല. കാറ്റുകൊണ്ടാൽ അത് കഴിക്കാൻ പറ്റുകയില്ല. കൂവളത്തിന്‍റെ കായ പച്ചയോ പഴുത്തതോ പൊട്ടിക്കുമ്പോള്‍ കാറ്റു കണ്ടമാനം കൊണ്ടാൽ അതിനു ഒരു കറുപ്പുനിറം വരും. ആ കറുപ്പുനിറം വന്നു കഴിഞ്ഞാൽ അതിനു കയ്പ്പ് കൂടും. പിന്നെ കഴിക്കാന്‍ പ്രയാസമാണ്.

 ആ കാമ്പ് അഥവാ മജ്ജ നേരിട്ടും വെയിലത്തു വെച്ച് ഉണക്കിപ്പൊടിച്ചു സൂക്ഷിച്ചു വെച്ചും ഉപയോഗിക്കാവുന്നതാണ്. വെയിലത്തു വെയ്ക്കുമ്പോൾ കാറ്റ് കൊണ്ടാല്‍ കുഴപ്പമില്ല.

 കൂവളം നാട്ടില്‍ എവിടെയെങ്കിലുമൊക്കെ ഉണ്ടാകും. കായ പറിക്കുക. അതിന്‍റെ മജ്ജ എടുക്കുക. വെയിലത്തിട്ടുണക്കുക. ആ മജ്ജ പൊടിച്ചു വെക്കുക. ആ പൊടി ഒരു ടീ സ്പൂണിനു താഴെ കൊടുത്താൽ പനി പോകും. എല്ലാ ഉദര സംബന്ധങ്ങളായ രോഗങ്ങളും പോകും. അതിൽ നിന്നു വരുന്ന പനികൾക്കും അത്യുത്തമമാണ്.

 ഇന്നു നമ്മൾക്കുണ്ടാകുന്ന ഉദരരോഗങ്ങളില്‍ 80% രോഗങ്ങളും കൂവളക്കായയുടെ മജ്ജ കൊണ്ടു മാറും. Gastrointestinal tract-ല്‍ വരുന്ന ഏതാണ്ട് ഒട്ടു മിക്ക രോഗങ്ങളും ഇതു കൊണ്ടുപോവും. മജ്ജ വെറുതെ കഴിച്ചാൽ മതി. പഞ്ചസാര ചേർത്തും കഴിക്കാം. പാലിൽ ചേർത്തും, മോരിൽ ചേർത്തും കഴിക്കാം. പഴയ ആളുകൾ കൂവളത്തിന്‍റെ മജ്ജ പഴുത്തത് മോരിലടിച്ചു മോരുകാച്ചി കുടിക്കുമായിരുന്നു. കേരളത്തിനു പുറത്ത് ആളുകള്‍ ഇന്നും ഇതൊക്കെ ചെയ്യും. വടക്കേ ഇന്ത്യാക്കാരന്‍ കൂവളത്തിന്‍റെ പഴം പഞ്ചസാരയില്‍ “മുറബ്ബ” ആക്കി സൂക്ഷിച്ചു വെച്ച് കഴിക്കും. ഇതൊക്കെ ഉദരത്തിന്‍റെ രോഗങ്ങൾക്ക് ഉള്ളതാണ്. എല്ലാ ഉദരരോഗങ്ങളും അതിന്‍റെ കൂടെ മാറുമെന്നുള്ളതാണ്. ഉദരരോഗങ്ങള്‍ക്കൊപ്പം വരുന്ന പനിക്ക് ഈ മരുന്ന് വളരെ ഉത്തമമാണ്.

കടപ്പാട് :  നിര്‍മ്മലാനന്ദം

352 ¦ പനി ¦ FEVER ¦ പകര്‍ച്ചപ്പനികള്‍

352 ¦ പനി ¦ FEVER  ¦  പകര്‍ച്ചപ്പനികള്‍
352 ¦ പനി ¦ FEVER ¦ പകര്‍ച്ചപ്പനികള്‍

പകര്‍ച്ചപ്പനികള്‍ക്ക് ചുക്ക്, ദേവതാരം, കൊത്തമല്ലി, കിരിയാത്ത്

☑ ചുക്ക്, ദേവതാരം, കൊത്തമല്ലി. ഇവ മൂന്നും കഷായം വെച്ചു കഴിച്ചാൽ പനി പോകും.

☑ കഷായം വെച്ചു കഴിക്കുക എന്നതു കൊണ്ട് ദ്രവ്യങ്ങള്‍ സമം എടുത്ത് മൊത്തം 60 ഗ്രാം ചതച്ച് 12 ഗ്ലാസ്‌ വെള്ളത്തില്‍ തിളപ്പിച്ച്‌ ഒന്നര ഗ്ലാസ്സാക്കി വറ്റിച്ചു പിഴിഞ്ഞരിച്ചു അര ഗ്ലാസ് വീതം മൂന്നു നേരം കഴിക്കുക എന്നാണ് ഉദ്ദേശിക്കുന്നത്. ഇവിടെ മൂന്നു ദ്രവ്യങ്ങളും 20 ഗ്രാം വീതം മൊത്തം 60 ഗ്രാം എടുത്തു വേണം കഷായം ഉണ്ടാക്കുവാന്‍.

☑ ഇതിൻറെ കൂടെ കിരിയാത്ത് (നിലവേമ്പ്) ചേർത്താൽ പകർച്ചപ്പനികൾക്കും പ്രമേഹജ്വരങ്ങൾക്കും അത്യുത്തമമാണ്. പ്രത്യേകിച്ച് Glucose Tolerence നഷ്ടപ്പെട്ട വൈകല്യത്തിൽ ഉത്തമമാണ്.നമ്മളിലെ ഗ്ലുക്കോസ് സൂക്ഷിച്ചു വെക്കുന്നത് ലിവറാണ് , അതു സൂക്ഷിക്കാനുള്ള കഴിവ് ലിവറിനു കുറഞ്ഞാൽ ആദ്യം വര്‍ദ്ധിക്കുന്നത് ഈ ചൂടാണ്. രണ്ടാമതാണ്‌ തല ചുറ്റുന്നക്കെ. ഉടനെ പഞ്ചസാരയുമൊക്കെ കഴിക്കണം. കുറഞ്ഞു പോയാൽ ചിലർക്ക് ക്ഷീണം വരും, ആഹാരം സമയത്തു ചെന്നില്ലേൽ. കിരിയാത്ത് ചെന്നാലുടനെ അതു കരളിനെ ത്വരിപ്പിക്കും. കിരിയാത്ത് മാത്രം കഴിച്ചാൽ പോലും അതിനെ ത്വരിപ്പിക്കും. അതുകൊണ്ട് കിരിയാത്ത് കരള്‍ രോഗങ്ങളില്‍ പ്രധാനമാണ്. ഇതൊക്കെയാണ് ആ അമ്മമാർ നേരത്തെ കണ്ടത്തിയത്.

☑ കിരിയാത്ത് ചേര്‍ക്കുമ്പോള്‍ ഓരോ ദ്രവ്യവും 15 ഗ്രാം വീതം എടുത്തു വേണം കഷായം ഉണ്ടാക്കേണ്ടത്.

☑ നാലും ചേര്‍ന്ന ഈ കഷായം ഡെങ്കിപ്പനി, ചിക്കന്‍ഗുനിയ പോലെയുള്ള പനികളില്‍ അതീവഫലപ്രദമാണ്. പനി മാറും എന്നത് പല തവണ അനുഭവമുള്ളതാണ്.

☑ വൈറസ് ഉണ്ടാക്കുന്ന പനികളില്‍ ചെറുകടലാടി, നീലയമരി, പെരിങ്ങലം മുതലായ കൃമിഘ്ന ഔഷധികളുടെ സ്വരസം കഴിക്കുന്നത് കൂടുതല്‍ ഫലം ചെയ്യും.

♥നിര്‍മ്മലാനന്ദം♥

351 ¦ പനി ¦ FEVER

351 ¦ പനി ¦ FEVER
351 ¦ പനി ¦ FEVER

പനിയ്ക്കു വിഴാലരി

വിഴാലരിക്കാമ്പ് തേനിലരച്ച് കവിൾകൊണ്ടാൽ പനി പോകും. വായിൽ കവിൾകൊണ്ടാൽ മതി. വിഴാലരി കുത്തുമ്പോൾ അതിനകത്തൊരു കാമ്പുണ്ട്. അത് തേനിലരച്ച് കവിൾകൊണ്ടിരുന്നാൽ മതി. കുറച്ച് ഉമിനീര് ഇതുമായി കലര്‍ന്ന് അകത്തേക്ക് പോകുമ്പോൾ പനി മാറും. വേറെ മരുന്ന് കഴിക്കണ്ടാ. പക്ഷേ ഇത് ഉള്ളില്‍ പോകുന്നതിന്‍റെ ഫലമായി വയർ ചെറുതായൊന്ന് അയഞ്ഞുപോകും.

വളരെ വിശേഷവിധിയായ ഒരു മരുന്നാണ്. ഇതൊക്കെ അതീവ രഹസ്യം എന്നാണ് അമ്മമാർ പറഞ്ഞിട്ടുള്ളത്. ഇതൊക്കെ വീട്ടിൽ ചെന്ന് ഉറക്കെ പറയരുത്. ഇത്ര അതീവ രഹസ്യമായതൊക്കെ ഇങ്ങനെ പറയാമോ എന്നൊക്കെ ആരും ചോദിക്കും. അതീവ രഹസ്യം എന്നാല്‍  അത്യുത്തമം  എന്ന് അര്‍ത്ഥം എടുത്താല്‍ മതി.

വയറ്റില്‍ കൃമിശല്യം ഉണ്ടായാല്‍ അതിനും വിഴാലരി നല്ലതാണ്

♥ നിര്‍മ്മലാനന്ദം ♥

31 ¦ കീഴാര്‍നെല്ലി ¦ Phyllanthus Niruri

31 ¦ കീഴാര്‍നെല്ലി ¦ Phyllanthus Niruri
31 ¦ കീഴാര്‍നെല്ലി ¦ Phyllanthus Niruri

കീഴാര്‍നെല്ലി എന്ന് കേള്‍ക്കാത്ത മലയാളി പഴയ തലമുറയില്‍ ഉണ്ടാകാന്‍ തരമില്ല. മഞ്ഞപ്പിത്തം എവിടെയുണ്ടോ അവിടെ കീഴാര്‍നെല്ലി ഉണ്ട്.

ഭൂമ്യാമലകികാ പ്രോക്താ ശിവാ താമലകീതിച
ബഹുപത്രാ ബഹുഫലാ ബഹുവീര്യാ ജടാപിച
ഭൂധാത്രീ വാതകൃത്തിക്താ കഷായാ മധുരാഹിമാ
പിപാസകാസപിത്താസ്ര കഫപാണ്ഡു ക്ഷതാപഹാ
(ഭാവപ്രകാശം)

ദ്രാക്ഷാഭയാമലക പിപ്പലീ ദുരാലഭാ ശൃംഗീ
കണ്ടകാരികാ വൃശ്ചീര പുനര്‍നവാ താമലക്യ
ഇതി ദശേമാനി കാസഹരാണി ഭവന്തി |
ശടീ പുഷ്കരമൂലാമ്ളവേതസൈലാഹിംഗ്വഗുരൂ
സുരസാ താമലകീ ജീവന്തീ ചണ്ഡാ
ഇതി ദശേമാനി ശ്വാസഹരാണി ഭവന്തി |
(ചരകം)

കീഴാര്‍നെല്ലിയ്ക്ക് ഭൂമ്യാമലകികാ, ശിവാ, താമലകീ, ബഹുപത്രാ, ബഹുഫലാ, ബഹുവീര്യാ, അജടാ, ഭൂധാത്രീ ഇങ്ങനെ പേരുകള്‍. സസ്യശാസ്ത്രനാമം Phyllanthus Niruri.

തിക്ത-കഷായ-മധുര രസം. ശീത വീര്യം.

വാതത്തെ വര്‍ദ്ധിപ്പിക്കും. കാസം, തണ്ണീര്‍ദാഹം, രക്തദോഷം, കഫം, പാണ്ഡുരോഗം (അനീമിയ), ക്ഷതം എന്നിവയെ ശമിപ്പിക്കും.

കാസശ്വാസഹരവും, മൂത്രത്തെ വര്‍ദ്ധിപ്പിക്കുന്നതും, ദാഹത്തെ ശമിപ്പിക്കുന്നതും, ശോഫഹരവും, വ്രണത്തെ ഉണക്കുന്നതും, ജ്വരഹരവും ആകുന്നു. പഞ്ചാംഗകഷായം മലേറിയയെ ശമിപ്പിക്കും.

മഞ്ഞപ്പിത്തത്തിനുള്ള ഒറ്റമൂലിയാണ് കീഴാര്‍നെല്ലി.
പച്ച വേര് ഒരു ഉറുപ്പികത്തൂക്കം (10 ഗ്രാം) അരച്ചു ഒരു ഗ്ലാസ് ശീതോഷ്ണപയസ്സില്‍ (കറന്ന ഉടനെയുള്ള പാലില്‍) കലക്കി ദിനം രണ്ടു നേരം സേവിച്ചാല്‍ മഞ്ഞക്കാമല (മഞ്ഞപ്പിത്തം) ദിവസങ്ങള്‍ക്കുള്ളില്‍ ശമിക്കും.
വേരോ, ഇലയോ ഉണക്കി ചൂര്‍ണ്ണം ആക്കി ഓരോ സ്പൂണ്‍ വീതം കഴിച്ചാലും ഫലം സിദ്ധിക്കും.

കരള്‍ രോഗങ്ങളില്‍ കീഴാര്‍നെല്ലി ചേര്‍ന്ന ഈ പ്രയോഗം അതീവഫലപ്രദമാണ്. ജീരകം, ഏലത്തരി, കല്‍ക്കണ്ടം, പറിച്ചുണക്കിയ കീഴാര്‍നെല്ലി ഇവ നാലും വെവ്വേറെ നന്നായി പൊടിച്ചുവെച്ച് ആവശ്യമുള്ളപ്പോള്‍ നാലും സമമെടുത്ത് പാലില്‍ ചാലിച്ച് ഒരു നേരം 5 ഗ്രാം മുതല്‍ 10 ഗ്രാം വരെ പ്രഭാതത്തില്‍ വെറും വയറ്റില്‍ കഴിക്കാം.ഇത് എല്ലാ കരള്‍രോഗങ്ങളിലും ഫലപ്രദമാണ്. കരളിലെ ദീപനരസങ്ങളെ സാധാരണരീതിയിലാക്കാനും, അണുബാധ മാറ്റാനും ഈ ഔഷധം സഹായകമാണ്. ഫാറ്റി ലിവര്‍ ഉള്ളവരില്‍ ഇത് ഫലപ്രദമാണ്.

കീഴാര്‍നെല്ലിയുടെ സ്വരസം നിത്യേന വെറും വയറ്റില്‍ കഴിക്കുന്നതും കരള്‍രോഗങ്ങളില്‍ ഗുണപ്രദമാണ്. 5 ml മുതല്‍ 15 ml വരെ കഴിക്കാം.

പൂയസ്രാവം (Gonorrhea) അസ്ഥിസ്രാവം (leucorrhoea) അത്യാര്‍ത്തവം (Menorrhagia) മറ്റു ജനനേന്ദ്രിയ മൂത്രാശയ സംബന്ധിയായ രോഗങ്ങളിലും കീഴാര്‍നെല്ലി ഫലപ്രദമാണ്. കീഴാര്‍നെല്ലി സമൂലം ചതച്ചു പിഴിഞ്ഞെടുത്ത നീര് ചൂടുള്ള പാലില്‍ രാവിലെ കഴിക്കാം. ഒരു ഔണ്‍സ് കീഴാര്‍നെല്ലിനീരും മൂന്ന് ഔണ്‍സ് പാലും ആണ് കണക്ക്.

കീഴാര്‍നെല്ലി സമൂലം കഷായം വെച്ചു കഴിക്കുന്നത്‌ പ്രമേഹത്തില്‍ ഗുണകരമാണ്. ഇതേ കഷായം ചുമയും നെഞ്ചുവേദനയും ഉള്ളപ്പോഴും ഫലപ്രദമാണ്.

അഞ്ചു മില്ലി ചിറ്റമൃതിന്‍ നീരും പത്തു മില്ലി കീഴാര്‍നെല്ലി നീരും ഇരുപതു മില്ലി മുക്കുറ്റിനീരും നാല്‍പ്പതു മില്ലി നെല്ലിക്കാനീരും കൂടി അരക്കഴഞ്ച് (രണ്ടര ഗ്രാം) വരട്ടുമഞ്ഞള്‍പ്പൊടി ചേര്‍ത്തു കഴിച്ചാല്‍ ഏതു പ്രമേഹവും വരുതിയിലാകും.
നെല്ലിക്കാനീര്, കീഴാര്‍നെല്ലിയുടെ നീര്, ചിറ്റമൃതിന്‍റെ നീര്, വരട്ടുമഞ്ഞള്‍പ്പൊടി ഇവ ചേര്‍ത്തു കഴിച്ചാലും പ്രമേഹം നിയന്ത്രണത്തിലാകും. അഞ്ചു മില്ലി ചിറ്റമൃതിന്‍നീരും, പത്തു മില്ലി കീഴാര്‍നെല്ലിനീരും, നാല്‍പ്പതുമില്ലി നെല്ലിക്കാനീരും ചേര്‍ത്ത്, അതില്‍ അരകഴഞ്ച് വരട്ടുമഞ്ഞള്‍പ്പൊടി ചേര്‍ത്തു കഴിക്കാം.
കീഴാര്‍നെല്ലി പിഴിഞ്ഞ നീര് – 10 ml, ചിറ്റമൃതിന്‍ നീര് – 5 ml, മുക്കുറ്റി നീര് – 20 ml, നെല്ലിക്കാനീര് – 40 ml, വരട്ടുമഞ്ഞള്‍പ്പൊടി – 2.5 gm എന്നിവ ചേര്‍ത്തു നിത്യം സേവിച്ചാല്‍ പ്രമേഹം നിയന്ത്രണത്തിലാകും.
മേല്‍പ്പറഞ്ഞ മൂന്ന് ഔഷധങ്ങള്‍ ഉപയോഗിക്കുമ്പോഴും രക്തത്തിലെ ഷുഗര്‍ കുറയാതെ ശ്രദ്ധിക്കണം. ഏതു പ്രമേഹവും ഈ പ്രയോഗം കൊണ്ടു വരുതിയിലാകും.

കീഴാര്‍നെല്ലിയുടെ ഇലയും വേരും കഷായം വെച്ച് കുറച്ചു നാള്‍ കവിള്‍ക്കൊണ്ടാല്‍ വായ്‌പ്പുണ്ണ് പിന്നീടൊരിക്കലും ഉണ്ടാകാത്ത വിധം ശമിക്കും.

കീഴാര്‍നെല്ലി സമൂലം പറിച്ച് ഉണക്കി പൊടിച്ചു ചൂര്‍ണ്ണമാക്കി, കഞ്ഞിവെള്ളത്തില്‍ ചാലിച്ച് മുറിവുകളിലും വ്രണങ്ങളിലും വെച്ചുകെട്ടിയാല്‍ മുറിവുകളും വ്രണങ്ങളും ശമിക്കും.

കീഴാര്‍നെല്ലിയുടെ ഇലയും കരയാമ്പൂവും മുലപ്പാലില്‍ അരച്ച് നെറ്റിയില്‍ ലേപനം ചെയ്‌താല്‍ ശക്തമായ തലവേദനയും ശമിക്കും.

കീഴാര്‍നെല്ലി പാലില്‍ അരച്ചു തലയില്‍ നിത്യം പൊതിഞ്ഞാല്‍ തലയില്‍ രോമവളര്‍ച്ചയില്ലാത്തവരില്‍ രോമവളര്‍ച്ച ഉണ്ടാകും എന്ന് ഒരു യൂനാനി പ്രയോഗം ഉണ്ട്.

കീഴാര്‍നെല്ലി അരച്ച് മോരില്‍ (തക്രം) സേവിച്ചാല്‍ സാധാരണ ഛര്‍ദ്ദി നില്‍ക്കും. കൃമിബാധയുള്ളവര്‍ സേവിച്ചാല്‍ കൃമികള്‍ നശിക്കും.

കീഴാര്‍നെല്ലി സമൂലം പറിച്ചെടുത്ത് അരച്ചു മോരില്‍ സേവിച്ചാല്‍ പഴകിയ ആമാതിസാരവും രക്താതിസാരവും ശമിക്കും.

അഞ്ചു വയസ്സില്‍ താഴെ പ്രായമുള്ള ബാലകരില്‍ മലബന്ധം ഉണ്ടായാല്‍ കീഴാര്‍നെല്ലി അരച്ച് വെണ്ണചേര്‍ത്ത് വയറ്റിന്മേല്‍ പുരട്ടിയാല്‍ ശോധന ഉണ്ടാകും.അഞ്ചു വയസ്സിനു മുകളില്‍ പ്രായമുള്ളവരില്‍ ഈ പ്രയോഗം അത്ര ഫലപ്രദമല്ല.

ചിലരില്‍ പിത്തം മൂലം തലചുറ്റലും തല പുകച്ചിലും ഉണ്ടാകാറുണ്ട്. ഇത്തരം അവസ്ഥയില്‍ എള്ളെണ്ണയില്‍ ഇരട്ടി കീഴാര്‍നെല്ലിയുടെ സ്വരസം ചേര്‍ത്തു കാച്ചി പാകമാക്കി പുരട്ടുന്നത് തലചുറ്റലും മൂര്‍ദ്ധാവ് പുകച്ചിലും മാറാന്‍ സഹായകമാണ്.

കീഴാര്‍നെല്ലിയുടെ നീരില്‍ നല്ല മുളങ്കര്‍പ്പൂരം സേവിക്കുന്നത് എല്ലാത്തരം പാണ്ഡുതകള്‍ക്കും ലുക്കീമിയയ്ക്കും അതീവഫലപ്രദമാണ്.

കീഴാര്‍നെല്ലി ഇന്തുപ്പു ചേര്‍ത്ത് അരച്ച് ചെമ്പുപാത്രത്തില്‍ വെച്ച്, കണ്ണില്‍ തേച്ചാല്‍ നേത്രാഭിഷ്യന്ദം കൊണ്ടുള്ള നീരും വേദനയും മാറുമെന്നു ചക്രദത്തം.

അന്ധവിശ്വാസം : ഇനി ഒരല്‍പം അന്ധവിശ്വാസം. കീഴാര്‍നെല്ലി അതീവപ്രഭാവമുള്ള ഔഷധി ആണ്. തൊട്ടുരിയാടാതെ വേണം പറിച്ചെടുക്കാന്‍. ഔഷധിയിലെ ദേവതയോട് പ്രാര്‍ത്ഥിച്ചു വേണം പറിച്ചെടുക്കാന്‍ എന്ന് പഴമക്കാരായ വൈദ്യവിശാരദന്‍മാരുടെ മതം.

മുന്‍‌കൂര്‍ജാമ്യം: ഞാന്‍ ലൈസന്‍സ് ഉള്ള ഭിഷഗ്വരന്‍ അല്ല. ഇവിടെ കുറിച്ചിരിക്കുന്നതൊക്കെ ആചാര്യമുഖത്തുനിന്നു കേട്ടും പുസ്തകങ്ങള്‍ വായിച്ചും അറിഞ്ഞ കാര്യങ്ങള്‍ ആണ്. ഇതൊക്കെ പ്രയോഗിക്കുന്നതിനു മുമ്പ് ലൈസന്‍സ് ഉള്ളവരോട് ചോദിച്ച് ഉറപ്പിച്ച് മാത്രം പ്രയോഗിക്കുക. ഈ കുറിപ്പ് അറിയാനും അറിയിക്കാനും മാത്രം ആണ്.
@anthavasi